أول يوم امتحان ... يا سلام على أول يوم امتحان
كنت متفائلة جدا جدا وبقول ان شاء الله الامتحان هيجي كويس وهعرف احل مع أني اصلا مكنتش مذاكرة ولا أعرف اي حاجه عن الماده ومع ذلك بردو كنت متفائلة ... ليه!!! انا مش عارفه يمكن عشان مادة علم نفس عام ؟؟؟ بردو مش عارفه
من يومين بس بدأت افتح الماده واشوف ايه اللي فيها بس الحمدلله اني اصلا عارفه هي بتتكلم عن ايه
لاقيتني خير اللهم اجعله خير تايهه ومش عارفه اذاكر وحاسه اني مش عارفه اجمع جملة مفيده على بعضها ومع ذلك بردو كنت متفائله
امبارح قلت بقة مينفعش كده لازم اقعد اذاكر ده الامتحان بكرة خلاص كلها كام ساعة يعني
قعدت بردو حسيت بنفس الاحساس (التوهان) بس قررت بقة اني هضغط على نفسي شويتين تلاته عشان اذاكر خلاص لا مفر مذاكرة ثم مذاكرة
وأنا قاعده واذ فجأة كده بعون الله تجيلي نجده من السما ..اتصلت بيا صحبتي وقالتلي ان في محاضرة ما من اللي انا محضرتهمش (هم كتير بصراحة) الدكتور اداهم اسئلة وقالهم ذاكروها كويس جدا عشان تنجحوا ان شاء الله .. زادت نسبئة التفاؤل اوي عندي وقررت اني هذاكر الاسئلة اللي الدكتور قال عليها بس (ده غير الحاجات اللي كنت مذكراها قبل ما اعرف بموضوع الاسئله) وقلت ده على ده اهم يعملو حبة معلومات حلوين يسندوني في الامتحان واهو كله يمشي
فضلت قاعده طول الليل بذاكر في الاسئلة واحفظ واصم فيهم وقاعده وسط هرم من الكتب والورق واديا وجعتني خلاص مش قادرة وطبعا على الحال ده مفيش نوم قبل الامتحان ورحت الامتحان صاحية وبرغم كل ده فأنا متفائله
وصلت الجامعه وأول ما شفت اصحابي ولجنة الامتحان قلتلهم كلمة وحده
!!! أنا مش متفائلة خالص
كانت كل حاجه حواليا لا توحي بالتفاؤل ابتداء من اني مكنتش لاقيه لجنتي مرورا بالمراقبين ... اه المراقبين ولا كأنهم بيتعاملو مع ناس كبار اطلاقا تقريبا كدبوا عليهم وقالولهم انهم داخلين يراقبوا على فصل كي جي وان مش على ناس كبار في اولى كلية
وصولا في النهاية الى الامتحان
بعد ان كتبت اسمي ورقم جلوسي على ورقة الاجابة قعدت زي الشطورة مستنية ورقة الاسئلة تجيلي
وجاتلي ورقة الاسئلة
ان ان اااااااااااااااااااان تش ..دي الموسيقى التصويرية ..واسفين على الازعاج
ابص في ورقة الاسئلة لاقيت الامتحان 3 اسئلة واختار منهم اتنين ويا سبحان الله ولا اي حاجه من اللي انا ذاكرتها فيهم
ايه الهنا ده ؟ طيب هو انا المفروض اعمل ايه ؟ طيب هجاوب على ايه وانا اصلا مش عارفه حاجه ؟
اومال فين الاسئلة اللي الدكتور قال عليها؟ هو الدكتور قال ذاكروها عشان هيجي منها في الامتحان ولا قال ذاكروها واعرفوها كويس عشان انا مش هجيبها في الامتحان؟ لا تكون صحبتي سمعت غلط؟ ادعي على صحبتي ؟ لا حرام ماهي زيها زيي بردو ؟.. شكل التفاؤل جه في الاخر على دماغي.. طيب وبعديييييييييييييين؟
ايه ده !! ده في سؤال انا عرفاه .. جميل بسم الله بقة ونبدأ نحل
استجمعت كل شجاعتي وقلت لنفسي جاوبي واوصيكي بالرغي ... بصراحة نفسي سمعت الكلام وقعدت ترغي كتير اوي بل وتطرقت الى التأليف ايضا .. وبعد ماقعدت نص الوقت احل في نقطة في سؤال اكتشف اني مش عارفه بقية نقط السؤال
فقررت بكل شجاعه اني هحل السؤالين التانين في بقية الوقت المتبقي وحلال على الدكتور النقطه الزياده اللي انا حلتهاوضيعت فيها نص وقتي ... وطبعا مش محتاجة اقلكم ان حل الاسئلة طبعا طبعا مكنش حل ده كان تأليف
انا وبكل فخر واعتزاز ألفت علم نفس من اول وجديد ... اوماااال مش لازم يبقة ليا بصمتي في التاريخ بردو .. ولا ايه ؟
المهم في الموضوع ان بعد ده كله اكتشف ان العيب مكنش فيا ده الامتحان كان فعلا صعب على الكل
ااااااه وانا اللي كنت فاكرة العيب فيا طلع العيب في الدكتور
ده كان اول يوم امتحان والاستفتاحية خير طبعا .. ربنا يستر على بقية المواد بقة
.... بس انا بردو متفائلة
11 comments:
هئ هئ هئ هئ
يا خراب بيتك يا عمرو
الله يبشرك بالخير
علم نفس
ومعرفتيش حاجة
عاااااااااااااااااا
حرام عليكي
طب اكدبي وقولي حليت كويس
علي ما امتحن انا كمان
ربنا يستر بقي
والدكتور بتاعنا ميعملش فينا مقلب
زي السنة اللي فاتت
فكرتيني بعلم نفس وايام امتحاناتو
اصل انا عقبالك لسه مخلصه
الكليه
ومع انو كان من اكتر المواد الي بحبها
لكن اكن اكتر المواد الي بكسل اذاكرها
وبقوم بالتأليف
فيها
والحمد لله جاب نتيجه بردو وكنت بنجح
اديني بديكي تفاؤل اهو
هع هع هع هع هع هع هع هع
قال ايه الدكتور اداهم سؤالين وقلهم زاكرو دول كويس تقوموا تصدقوا
دى اول سنه ليكى يابنتى واللا ايه؟؟؟
خديها حكمة للزمن.. كلام الدكاترة عامل زى الشريك المخالف واللا بيقولو عليها ايه دى ياختى مانا عارفه
فى دكاترة كتير بيحددو الملغى وتلاقيهم جايبين منه
انا سمعت من قريبتى ان الدكتور مرة جابلهم سؤال من المقدمة:)))
والدكتور اوقات كتير بيحدد اسئلة ويقول ركزوا عليها والكل بقى ايه مايمسكش غيرهم وفى الاخر يكون مقلب انما ايييه
بس برضو عشان المصداقيه فى دكاترة ولاد ناس وكلامهم بيمشوه صح
وبالنسبة بقى لموضوع المذاكرة..
مش هقدر اقولك بقى كان المفروض تذاكرى من قبل كدا وتنظمى مواعيدك لانى بصراحه كنت بكمل مذاكرتى فى المواصلات واحيانا وانا داخله اللجنة:)))))
بس عموما خللى بالك فى المواد الجاية وربنا يوفق كل اللى وراهم امتحانات ياااااارب
تحياتى ليكى
السلام عليكم
معلش خيرها فى غيرها وربنا يوفقك فى المواد اللى جايه يارب وجميل جدا ان يكون الانسان متفائل رغم انه عارف انه ماعملش اللى عليه بس ساعات التفاؤل بيديكى حيويه ونشاط وصدر متسع جدا لتقبل اى وضع
ولكن نصيجتى ليكى لازم تزاكرى كل ماده كويس وماتعتمديش على كلام الدكاتره انا شخصيا ايام الكليه كنت بزاكر الماده كلها واركز على حاجات معينه وبرضو بحط كلام الدكتور يعنى 50فى الميه محور اهتمامىوبكده بكون لميت المادهواعتمدت على ذلك من وانا فى سنه اولى لحد ما اتخرجت ويارب عقبال ما تخلصى وتتخرجى وتفتكرى الايام دى كلها
اتمنى لكى النجاح انتى ونور وكل اللى بيمتحنوا جميعا يارب
يابختك بالتفاؤل
بتجبيه منين ؟
:P
انا بمر بأسوء أيام حياتي
امتحاني بعد أسبوع انا لاقادرة آكل ولا انام ولا طايقة اذاكر
:(
انا عمري ماكون متفائلة وانا داخلة على امتحان أبدا
خصوصاا السنة دي كل الناس حاطة املها فيا وانا شكلي حخيبه باذن الله
:(
ده في حد ذاته انجاز
انك تألفي علم نفس جديد
المفروض تاخدي الدكتوراه علي طول
ذاكري بقي
و ركزي في اللي جاي
ايه ده يا ربي
ربنا يوفقك يا رب
تحياتي
amr ahmed:
متعيطش بس وان شاء الله الامتحان هيجي كويس وهتعرف تحل مش هتخيب زيي :D
وبعدين انا كل موادي اساسا علم نفس
:(
واصلا اصلا انا مبكدبش :p
ربنا معاك يا عمرو ان شاء الله في الامتحان ومع كل الناس اللي بتمتحن
----------------------------------
yasmina
اولا كده نورتيني
فعلا علم النفس سهل جدا انك تألفي فيه بس لازم بردو تكوني عارفه انتي بتألفي ايه مش أي تأليف وخلاص .. ده علم نفس بردو مش أي أي
؛)
----------------------------------
صرصارتي
اه أول سنه ليا بس مش أول مرة نجرب الدكتور ده وهو وعدنا في الترم الأول وصدق معانا شكله كان بيجر رجلنا بس
:( انما بعد كده عمل فينا العمله السوده ديه
بس تنكري ان المذاكرة في المواصلات جابت نتيجه ؟ :D
أم عهد
منوراني :)
تووووووبه اسمع كلام لدكتور ولا حتى كلام المحاضرة نفسها :D
التفاؤل ده هو الحاجه الوحيده اللي كانت مصبراني على المذاكرة
ميرسي على الدعوة الجميلة دي ربنا يخليكي
سلاماتي لعهد :)
-----------------------------------
باسمه
بروح عند عمو بقوله لو سمحت عاوزة لمده 3 اسابيع تفاؤل عشان الامتحانات هههههههههه
فكرتيني بفيلم ارض النفاق ههههههه
بصي يابنوته خليكي دايما متفائله عشان لو يأستي هيجيلك اكتئاب ومش هتعرفي تذاكري وهتكرهي كل حاجه حواليكي
كل شئ يدعو للتفاؤل .. ابتسمي يا باسمه :)
-----------------------------------
proid
انا مش عارفه انا ايه الناس دي
انا حقي ضايع في البلد دي لازم يقدروا المجهودات العظيمة اللي انا بعملها عشان اقوم بالتأليف ده ... عمرهم ماهيقدرو ابدا :(
ثانكس على الزيارة يارب تتكرر
تحياتي :)
عزيزتي ضوء القمر
خاليكي متفاءله عزيزتي دائما و انشاء الله ربنا يوفقك و تيجي النتيجه بالنجاح
دعواتي معاكي ياجميله
:)))))
هههههههههههه
عادي خالص يا بنتى اللى حصل ده طبيعي جدااااااا
كلنا مرينا بحاجات زي كده
عدم مذاكرة و تاليف و دكتور معقد و هكذا و تستمر الامتحانات
المهم ربنا يوفقك
كريم
Post a Comment