Thursday, September 6, 2007

ًاحياناً .... واحيانا




.... احياناً بحس اني مش واثقة في نفسي
واحياناً بحس اني مغرورة من كتر ثقتي بنفسي

.... احياناً بحس اني خايفة
واحيانا بحس اني بني ادمة مش طبيعية من كتر ما انا مش خايفه

.... احياناً بحس اني قاسية
واحياناً بحس اني جوايا حنان يملا الدنيا

.... احياناً بحس اني ظلمت
واحياناً بحس اني اتظلمت

.... احيانا بحس اني شجرة صلبة تقدر تقف في وش الريح
واحياناً بحس اني نبته من غير جذور ممكن تطير مع اول ريح

.... احياناً ببقه طموحة جداً
واحياناً بحس اني بلا هدف اصلاً

.... احيانا بحس اني مش انا
واحيانا بقول هو ده فعلا انا

Sunday, September 2, 2007

انا رجعت

رجعت بعد المفروض غياب اسبوعين
لكن اذ فجأة تقلص الاسبوعين الى اسبوع واحد بس
معرفش ازاي؟؟ بس سمعت سمع خير انه عشان الدراسة
دراسة؟؟ دراسة ايه يا جدعان ده لسه فاضل عليها مش اقل من اسبوعين
اكتشفت ان الازهر هيبدأ بدري اسبوع عن الدراسة العاديه .. وابن اختي اللي في
KG2
في مدرسة ازهر .. فرجعنا كلنا عشان خاطره
بس كان اسبوع جميل جدا في الساحل الشمالي ويوم في اسكندرية
يوم اسكندرية ده كان حكاية
اول مرة ازور اسكندرية من سنيييييين
اخر مرة زرتها كان من حوالي 10 سنين كده
رغم اني كنت صغيرة بس فاكرة اخر زيارة لاسكندرية دي اوي
حسيت ان كل حاجه زي ماهي متغيرتش .. كل شئ زي ماهو
الصورة زي ماهي مطبوعة في دماغي اخر مرة ... لاقيت اسكندرية عليها
حاجات بسيطة اوي اللي اتغيرت ومنها مكتبة اسكندرية اللي اول مرة اشوفها في حياتي

بجد لاقيتها تحفة

عديت من جمبها وبكل براءة بسأل ايه ده؟؟

لاقيت هجوووم عليا .. ايه ده ازاي متعرفيش؟؟

دي مكتبة اسكندرية
كنت بسمع عنها وبشوفها في التليفزون بس مكنتش متخيلة انها تحفة كده بجد
كان نفسي جدا ادخلها بس قلت مرة تانيه بقه .. عشان الوقت مسمحش
شغلتني اوي مكتبة اسكندرية من يوم ماشفتها واول مارجعت على طول سيرش في جوجل عن مكتبة الاسكندرية
ولاقيت الموقع الرسمي لمدينة الاسكندرية
ولاقيت التعريف بمكتبة الاسكندرية وقريتة سطر سطر
شوقتني اوي لزيارتها واكيد ان شاء الله هزورها في يوم ما
اعتقد بمناسبة الكلام عن مكتبة اسكندرية حتما ولابد نقول شكرا لماما سوزان
ما علينا
المهم اني كنت مفتقدة المدونة جدا وكنت مش عارفه ازاي هسيبها اسبوعين
بس جت من عند ربنا وسبتها اسبوع واحد بس