عارفين المثل اللي بيقول اللي اتلسع من الشوربة ينفخ في الزبادي هو انا ده بعد أول يوم امتحان والموقف الجميل اللي الدكتور( الله يسامحه )عملوا فينا قررت أني في الماده دي هذاكر المنهج كله وبصراحة المرادي الماده كانت سهلة وصغيوره خالص تتلخص في 6 اسئله فقدرت اخلصها كلها انما لو كانت غير كده مكنتش خلصتها طبعا عشان الامانه سبت جزئيه صغيره... ورغم اني كنت متفائله جدا بس أول ما بدأت مذاكرة حسيت اني مش متفائله اطلاقا لأني أول مرة اشوف الكلام اللي مكتوب في الكتاب ده (سبحان الله .. بنت مجتهده جدا ) ولسبب كمان ان الجزء التجريبي من الكتاب كان المفروض نسلمة للدكتور بس انا للاسف مسلمتوش وده لظروف خارجه عن ارادتي مع اني كنت مستعده تماما اني اسلمه بس نعمل ايه بقة (لازم عفريت يطلعلنا في كل حاجه كده) وده السبب اللي كان مخليني مش متفائله وحاسه اني مهما حليت في الماده دي فانا ساقطه فيها( مش لو حليت اصلا ) ده بالاضافه الى عدم المذاكرة ... فضلت اذاكر فيها طول الليل لحد ما بدأت افقد اعصابي وعندي شعور اكيد اني مش هلحق اخلص قبل الامتحان
لكن الحمدلله الامتحان كان الساعه 9 وانا خلصت مذاكرة الساعه7 (ده انجااااااز) .... مفيش نوم ولا حتى 10 دقايق لأني لو كنت نمت مكنتش رحت الامتحان وكان هيبقة لا حل ولا حضور من اصله (لامشيها من غير نوم احسن ) ... رحت الجامعه قابلت اصحابي لاقيت حالتهم زي حالتي صاحيين من قبلها بيوم وكلنا مش شافين قدامنا ... دخلنا الامتحان واحنا على حالتنا دي محدش عارف هو مين وليه اساسا !!! استلمت كراسة الاجابة وكتبت اسمي ورقم جلوسي وكنت خلاص قربت انام لولا اني سمعت صوت المراقب وفوقني وهو بيقول (ورق الاسئله جه كل واحد راسه في ورقته واللي هيبص قدامة هخبطه محضر غش ) قلت في نفسي بداية مبشرة بالامل !! كفايه على راسي الخبط اللي فيها مش ناقصه خبط محضر غش... ربنا يستر فوقي بقة عشان الامتحان جه
واستلمت ورقة الاسئلة ابص فيها عشان اقرأ الاسئلة لاقيت الامتحان 3 اسئله واختار منهم 2 وأول سؤال عيني وقعت عليه كان السؤال التاني ... عمركو شفتوا حد يقرأ السؤال التاني قبل ما يقرأ السؤال الاول اهو انا بقه قريته ولا قيته هو هو الجزئيه الصغيرة اللي انا سبتها (خير) فأكيد طبعا هحل السؤال الأول والتالت بس يارب ميكونش الدكتور ساب المنهج كله وجاب الامتحان كله في الجزئيه اللي انا مذكرتهاش دي (اصل انا عارفه النحس) ..بصيت في السؤالين التانين لاقيتهم الحمدلله كويسين ويتحلوا ... بدأت بالسؤال التالت وكان سهل وبسيط خالص الحمدلله لأنه كان من اول جزئية في المنهج وتم حل السؤال على خير الحمدلله نيجي للسؤال الأول واللي كان متكون من جزئين .. جميل... اناعارفه الجزء الاول وفكراه كويس اوي وعارفه الجزء التاني بس مش فكراه .. احل الجزء الأول وبعدين أعصر مخي في الجزء التاني برحتي بقة وحصل اني خلصت الاول وجه دور التاني .. يامخي افتكر.. ابدااااااااا ... هجبلك شيكولاتايايا لما نطلع.. ابدااااااااا .. طيب صدقني هننام لما نخلص بس افتكر عشان نخلص .... وده قفلت معاه انه مش هيفتكر يعني مش هيفتكر طيب اعمل اييييييييه ؟ بصراحة استعنت بزميل و سألت زميلي اللي كان قاعد جمبي (معندوش حجه المراقب انا مبصتش قدامي انا بصيت جمبي ) هو قالي اول حاجه وكأن مخي كان مستني الكلمة دي ويكمل هو كلام شكرت زميلي وقلتله خلاص اني افتكرت( مستغنيه عن خدماته يعني بس قلتها بزوق) والحمدلله خلصت امتحان على خير ... وعوض الامتحان اللي فات بس يارب الدكتور ميدققش في حكاية الكتب دي قولوا يارب
... بس انا متفائله خير للي الامتحان الجاي ان شاء الله
-------------------------------
تحديث
دي اخر مرة هكتب فيها عن الامتحانات عشان المواد الجاية للأسف متسمتحملش اني اقعد على النت كتير ... ادعولي
