اول يوم دراسة
اااااة اليومين دول عمري ماهنساهم في حياتي -يومين!!!يومين ايه يابنتي انتي بتقولي اول يوم يعني هو يوم واحد بس- لا
ماهو اول يوم دراسة عندي مقسوم يومين بس مش يومين ورا بعض يومين في شهرين ورا بعض
-بقلك ايه عشان منتوهش في الكلام احكي واخلصي-
نحكي بقة ... :)
---------------
يافرحتي اللي كانت مش سيعاني وأنا صاحية اول يوم دراسة الصبح
واخيرا....اخيرا هروح المدرسة زي اخواتي الكبار وهيبقا عندي مدرسين وواجبات بقة ومذاكرة زيهم
الله بجد انا فرحانة جدا
يللا يا ماما بسرعه الفطار بتاعي فين هتاخر على المدرسه -
روحي البسي جري على ماحضر الفطار -
البسي !! تيب هلبس ايه؟؟
اااااه....ايه دا فين المريلة؟؟
يااااااماااااماااااااا فين المريلة الازرقه بتعتي -
في الدولاب بتاعك يا حبيبتي مكوية ومتعلقه-
في ثواني كنت لبست المريله.....الله شكلها حلو اوي
ياماما المشط والشرايط البيضا اهم ..ممكن لو سمحتي تسرحيلي شعري
خلصت لبس خلاص
بابا...صباح الخير يا بابا ...ايه رايك في شكلي حلو في المريلة؟؟-
زي القمر يا حبيبتي يللا حضري حاجتك عشان اوصلك في سكتي -
وبسرعه جريت على شنطتي اللي انا حاطه فيها دفتري وقلمي من امبارح بليل
((: وحطيت معاهم السندوتشات وبالطبع ...مانسيتش الزمزمية
ونزلنا انا وماما وبابا عشان نروح المدرسة ......يااااه اخيرا
طبعا اليوم ده كان مفتوح للامهات انهم يقعدو مع اولادهم (عشان اول يوم )
بس طبعا انا مكنتش مستوعبه دا وفاكرة ماما هتكون معايا في المدرسة على طوول
وهنا بقة كانت المفاجأة اللي مكنتش متوقعاها اطلاقا ولا كانت تخطر على بالي اصلا
ماما لازم تسيبني في المدرسة لوحدي ..!!! هتروح وتسيبني لوحدي ..!!! لا
متفقناش على كدا
بس للاسف كان امر واقع عشان جه الوقت ان كل الامهات لازم يروحو فيه
وهنا بدا اليوم يبقة وحش
وبدات المعاناه
مش معاناتي لا ... معاناة المدرسين مني
وصله من السيمفونية الغير عذبه اطلاقا (العياط المتواصل طبعا) من نص النهار تقريبا
لحد لما جه معاد الانصراف وجه بابا ينقذني من الورطة دي اخيرا ويروحني البيت ....هييييه هروح بيتنا
تاني يوم بقة كنت اخدت على المدرسة وكأن مفيش حاجة حصلت اول يوم اطلاقا وكأني بقالي 5 سنين في المدرسة دي
وكنت فرحانة ومبسوطة جدا باول صديقة ليا في المدرسة (عزة) اللي كانت قاعده جمبي وبقينا اصحاب اوووي
كانت ايام حلوة
-------------
نيجي بقة لليوم التاني واللي كان بردو اول يوم واللي انا مسمياه يوم الصدمة
في اليوم دا جه الخبر المفاجئ (الصدمة) اني بعد ماقضيت شهر بحاله في مدرستي اللي حبيتها جدا ومع صحبتي (عزة) اني
هتنقل لمدرسة جديدة قريبة من البيت
لا ... لا... انا مش عوزة اروح المدرسة دي كل المدارس دي وحشين ومدرستي بس هي اللي حلوة -
دا اللي انا كنت بقوله لبابا
بس دا كان امر واقع وورقي اتنقل خلاص وفي اليوم دا رحت المدرسة الجديده وكأنه اول يوم دراسة من اول وجديد
وبالطبع اول يوم دراسة في المدرسة دي كان زي اول يوم دراسة في المدرسة اللي قبليها
وصلة من السيمفونية الغير عذبه خالص
لحد ماواجهت الواقع واخدت على مدرستي الجديدة
بس للاسف من غير صحبتي (عزة) اللي معرفش عنها اي حاجة من يومها لحد النهاردة
دا كان اول يوم دراسة (اللي هو اول يومين) ... ايام وراحت
ايه البنت المزعجه دي
3 comments:
جميل أن أكون صاحب أول تعليق فى المدونة كلها
أعجبتنى أسطورة الحب و الجنون للغاية قصة جميلة جداً
حقيقة أن الحب أعمى و لكنه يرى بعيون الجنون
على العموم من النهاردة بقينا أصحاب خلاص
و مبروك التدوين و صورة البلوج تحفة رقيقة للغاية
بجد البلوج ده هايبقى تحفة
كل سنة و كلنا بخير
الله يبارك في يا احمد وشرف ليا انا انك تكون صاحب اول تعليق في مدونتي المتواضعه ويارب دايما تعجبك على طول وطبعا اكيد انت حاسس بقمة سعادتي وانا بشوف اول تعليق ليا في مدونتي وخاصة لو كان من مدون زيك
تحياتي يا احمد :)
أنا مش مدون جامد قوى للدرجة دى يعنى بس متشكرين على المجاملة الرقيقة دى
بس بدون زعل أنا عملت نسخة من أسطورة الحب و الجنون على مدونتى مع الاشارة طبعاً بأنها منقولة من مدونتك
و تحياتى العميقة
Post a Comment