ظاهرة التسول

المتسول المشلول شاهد الشرطة فأطلق ساقيه للريح

جريدة الاخبار 12/12/2007

شهد شارع عماد الدين واقعة غريبة للنصب على الاهالي واستجدائهم والتسول منهم .. جلس عاطل على كرسي متحرك وملابسه ملوثة بالدماء من اثار عملية وهمية ووقفت خلفه شقيقته الكبرى تدفعه بالكرسي وتستدر عطف المارة بأنه اجرى جراحة خطيرة بالاضافة إلى انه عاجز ولا يجد ثمن الدواء .. وعندما شاهد الشرطة قفز من الكرسي ولاذ بالهرب ومن خلفة شقيقته وسط ذهول المارة ؟

ظاهرة التسول ... ليه ؟؟؟

مش هقول انها بقت حاجه زياده عن حدها وبس .. لا دي بقت حاجه فعلا مستفزة بقى العادي جدا انك تمشي في كل شارع متلاقيش اقل من 3 - 4 متسولين(ده كده قليل) ... مننكرش ان ديننا امرنا بالصدقات ومساعدة الفقراء ... ومننكرش كمان ان فيهم ناس بتبقه بجد محتاجةالمساعدة .. انما للاسف النصابين منهم غطوا على الناس اللي محتاجه مساعدة بجد

كتير اوي بقينا بنسمع في الاخبار وبنقرا في الجرايد عن متسول معاه ملايين من التسول واللي عنده عمارات في بلده ومعظمهم بيمثلوا انهم اصحاب عاهات واللي عامل عملية ومش لاقي تمن الدوا زي اخينا اللي مكتوب عنه الخبر اللي فوق

والمستفز اكتر .. في المترو تلاقي الواحد منهم او الواحده طالعين يشحتوا بورق كاتب فيه ظروفة سواء كان هو الوحيد اللي بيصرف على العيله او ان والده مريض وهو اللي بيصرف عليه ومش لاقي تمن الدوا !! .. لا بجد تطوروا .. كرامتهم وجعاهم اوي ومش قادرين يحكوا بنفسهم عن ظروفهم .. طيب ما تمن تصوير الورق تشيله يمكن ينفعك ما دام انت محتاج للنص جنيه او الربع جنيه اوي كده .. والناس اللي بتعمل ذكية وتقف قدام البنوك .. لعل وعسى اي واحد طالع من البنك جيبله قرشين يديلهم قرش صدقه عشان ربنا

!!! يباركله في القرش التاني

المشكلة ان المعلمين الكبار بيعلموا اطفال صغيرين .. اطفال اعمارهم لا تتجاوز 6 او 7 سنين ويكبروا ويتربوا ومفيش في اديهم حاجه غير انهم متسولين فقط لا غير

وتلاقي السيدات منهم بيشحتوا وعلى اديهم اطفال بعمر الشهرين متمرمطين يا عيني (مش السيدات طبعا لا الاطفال) في الحر والبرد طول النهار في الشوارع وتلاقيه اصلا لا ابنها ولا هي تعرفه بس ده لزوم الشغلانه

لو هنقول مفيش شغل وان هم بيعملوا كده لان مفيش حاجه تاني في ايدهم يعملوها لا في .. واللي عاوز يشتغل هيشتغل اي شغلانة شريفه تجيبله حتى قوت يومة على الاقل محافظ على كرامتة بس الناس دي بتحترف التسول .. بيجيب فلوس اكتر من اي شغلانة تانية

!! وشتغلوا ويتعبوا نفسهم ليه .. لما ممكن يبقوا متسولين

------------------------------------------------------

فكرة رائعة عند مهند الباحث عن الحقيقة .. ياريت كلنا نقراها ونشارك في تنفيذها

ويارب الموضوع يطلع للنور